BOSek «100 urte musika egiten» komikia aurkezten dizue. Aurten, gure mendeurrenaren zabalkunde publiko handiagoa lortzeko asmoz garatu ditugun proiektuetako bat da, Olabeagako horma-irudiarekin eta Bizkaia zeharkatu duen erakusketa ibiltariarekin batera.
Kike Infame marrazkigileak sortu du komikia, eta bertan alegiazko batuta batek BOSen historia kontatuko digu. Batuta hori 1922an eman zioten BOSeko lehen zuzendariari, Armand Marsicki, Orkestraren lehen kontzertua zuzendu zezan, eta ordutik zuzendariz zuzendari igaro da gaur egunera iritsi arte.
Istorio honek Orkestra gizartearekin lotzen du, zeinean jaio baitzen eta bizi baita.
Komikia Bizkaiko udalei, kontserbatorioei, musika-eskolei eta udal-liburutegiei banatuko zaie, eta pdf formatuan egongo da eskuragarri hementxe bertan, BOSen webgunean.
Colette Semkow Braseyk, Jerzy Semkow poloniar-frantziar zuzendari ospetsuaren alargunak, bere senarraren musika funtsa dohaintzan eman zion Bilboko Orkestra Sinfonikoari, izan ere, zuzendariak eta orkestrak 12 urte baino gehiagoko (1994-2007) lankidetza harreman estua izan zuten.
BOSentzat ohore eta erantzukizun handia da maisu ospetsu eta maitatu honen funtsa kontserbatzeko ardura izatea. Ondare aberats eta esanguratsu hau jasotzean, gure historiaren zati handi bat kontserbatzen dugu. Semkow maisua bezalako zuzendaritza-profesional handien sustapenari eta lanari esker, urte batzuetan zehar orkestrak hazkunde profesional eta artistikoko etapaz gozatu zuen, eta garai hori ezinbestekoa izan da ehun urteko orkestrak azken 30 urteetan izan duen bilakaera azaltzeko.
Zuzendari batentzat oso garrantzitsua da bere musika funtsa (idatzia eta iruzkindua), eta horrelako baliabide garrantzitsua gure artxibora gehitu da Colette Semkow Brasey bere alargunak hala nahi izan duelako.
Ziur gaude erabaki hori hartu zuela Semkow maisuarentzat orkestra euskaldun hau, Bilboko Sinfonikoa, oso garrantzitsua izan zelako. Horrek asko pozten gaitu, bereziki kontuan hartzen badugu bere ibilbide profesional zoragarrian harreman estua izan zuela maila artistikoko eta ospe handiko beste orkestra handi batzuekin.
Ziurra dena da bere presentziak, izaerak, ezagutzek eta kalitate profesionalak eta gizatiarrak gure erakundean aztarna sakona utzi zutela. Aztarna hori orain ezabaezina izango da, gure artxiboan SemkowFuntsa baitugu.
Jerzy Semkow funtsa
Funts hori BOSen Artxiboak inbentariatu du, eta beraz, une honetatik aurrera, eskuragarri dago adituek eta interesdunek kontsulta dezaten.
Giuseppe Verdi: Laudi alla vergine Maria
Semkow maisuaren musika funtsean nagusiki zuzendaritza partitura bilduma handi bat dago, eta gehienak berak landu zituen. Partiturekin batera arku-oharrak dituzten harizko kinteto batzuk daude, eta kasu askotan idatzita dago zein orkestrekin landu zituen obrak.
Katalogoan 1400 sarrera baino gehiago daude 70 kutxatan gordeta. Ez da dokumentazio irizpiderik jarraitu materiala antolatzeko, baizik eta inbentarioa egitean eta gordetzean kontserbazio baldintza ezin hobeak bete dira, horrela azkar eta erraz kontsultatu ahal izateko.
Dmitri Shostakovichen operaren partituraren azala: Katerina Izmailova
Errepertorioari dagokionez, konpositore sinfoniko handiak nabarmentzen dira, eta horien artean Mozart eta Beethoven leku pribilegiatuan daude kontserbatutako beraien obra kopuruari erreparatuz gero. Hala eta guztiz ere, beste konpositore garrantzitsu batzuek presentzia handia dute baita ere, besteak beste Brahms, Schumann, Mahler, Strauss eta Bruckner. Konpositore eslaviar asko daude baita ere. Hala, ohikoa da Tchaikovskyren, Prokofieven, Shostakovichen, edo Rachmaninoven lanak aurkitzea; autore horien opera lan asko eta asko kontsultatzea posible da. Maisuaren jatorria kontuan hartuta, hainbat autore poloniarren obrak daude baita ere, adibidez Szymanowski, Lutowslaski edo Moniuszko. Halaber, obra barroko gutxi batzuk ere badaude, Bach edo Corellirenak besteak beste.
Pieza bitxienetako bat XIX. mendeko errusiar konposizio faltsu bat da, Mykola Ovsianiko-Kulikovskyren 21. Sinfonia. Mikhail Goldstein biolinistak 1940ko hamarkadan idatzitako iruzurrezko pieza da.
Argitaletxeei dagokienez, Breitkopf & Härtel, Bärenreiter, Eschig edo Dover klasikoez gain, bitxia da State Music Publisher argitaletxeak duen nagusitasuna. Sobietar Batasuneko argitaletxea izan zen eta ia-ia autore errusiar guztiak ordezkatzen ditu.
M. Mussorgsky: Boris Godunov.
Semkow Funtsaren inbentarioa Eresbilen eta Musikeneko mediatekan ere kontsultatu ahal izango da.
Jerzy Semkow. Biografia
Jerzy Semkow orkestra zuzendari poloniarra izan zen. 1928ko urriaren 12an jaio zen Radomskon eta Lutryn hil zen 2014ko abenduaren 23an 86 urte zituela.
Zuzendari ospetsua izan zen, bai operan bai kontzertuetan. Bere mentoreak izan ziren besteak beste Erich Kleiber, Bruno Walter eta Tullio Serafin. 1954an hasi zen zuzendari lanetan Leningradon (gaur egun San Petersburgo dena) Yevgueni Mravinsky XX. mendeko zuzendari handienetakoarekin, eta bere laguntzailea eta kide estua izan zen 1956ra arte. Ondoren, hurrenez hurren Varsoviako Opera Nazionalaren Antzokian zuzendari artistikoa eta zuzendari iraunkorra izan zen (1958-1959); Varsoviako Opera Nazionaleko zuzendari nagusia (1959-1962); Danimarkako Operakoa eta Danimarkako Errege Orkestrakoa Kopenhagenen (1966-1976); RAI Orkestrakoa Erroman eta St. Louiseko Orkestra Sinfonikoko musika zuzendaria (1975–1979) eta Rochesterreko Orkestra Filarmonikoko musika aholkularia eta zuzendari titularra (1985–89). Zuzendari gonbidatu gisa jardun zuen Milango Scala Operan, Erromako, Florentziako, Veneziako (La Fenice), Ginebrako, Londresko (Covent Garden) opera antzokietan eta Moskuko Bolshoi antzokian.
Hainbat opera ekoizpen zuzendu zituen eta kontzertuak eskaini zituen (nagusiki Mozarten errepertorioarekin) d’Aix-en-Provenceko nazioarteko jaialdian. Jerzy Semkowk Europako, Amerikako eta Australiako orkestra sinfoniko garrantzitsuenetako asko zuzendu zituen.
1994 eta 2007 artean gonbidatu oso ohikoa izan zen Bilboko Orkestra Sinfonikoan. 10 urte baino gehiagoan Bilboko taldea zuzendu zuen 12 alditan baino gehiagotan, eta horrela, zuzendari poloniar-frantsesaren eta orkestraren artean harreman oso berezia eta estua sortu zen.
Semkow maisua 2007an BOS zuzentzen
Jerzy Semkowren jarduera batzuk gazteei zuzenduta egon ziren, adibidez kontzertuak zuzentzen zituen eta hitzaldiak eta masterclasseak eman zituen.
Jerzy Semkowk hainbat grabaketa egin zituen, bereziki Columbia, His Master’s Voice, Fona eta Musa (Polish Phonographic Company) konpainiekin. Jatorrizko bertsioan egin zuen Boris Godounoven grabaketak (Martti Talvelak egin zuen paper nagusia) sari asko jaso zituen, baita ere Saint-Louisko orkestrarekin eta abesbatzekin grabatu zituen Beethovenen obrek. Aipatzekoak dira baita ere Schumannen sinfonia osoak, Brahmsen sinfoniak, Beethovenen, Tchaikovskyren eta Scriabinen hainbat sinfonia, Igor Borodin Printzearen grabaketa eta Karol Szymanowskiren konposizio garrantzitsuenen zikloan, bere hirugarren eta laugarren sinfoniak. Jerzy Semkowk “Urrezko Diskoa” jaso zuen Mozarten sinfonien bere interpretazioengatik.
Jerzy Semkowk erlijio musikaren forma handiak ere landu zituen: Mozarten Requiema Chopinen heriotzaren 150. urteurrenean Eurovisionen Parisko Eglise de la Madeleinen eskainitako omenaldi kontzertu handi batean, Orchestre national de Francerekin eta Chœur de Radio-Francekin, Beethovenen Meza do maiorrean Parisen baita ere, eta Mozarten Meza do minorrean Parisko Notre-Damen Parisko Erlijio Musika Jaialdian.
Jerzy Semkow Polonian jaio zen, Colette Semkow Braseyrekin ezkondu zen eta frantziar herritarra zen. Arteen eta Letren Zalduna izan zen, ofiziala eta gero komandantea eta Varsoviako Frédéric-Chopin akademiako honoris causa doktorea (2005) eta Lodzeko musika akademiakoa baita ere (2013). Gloria Artis Poloniako Urrezko Ordenaren domina eman zioten baita ere.
2017ko urrian bere emazteak fundazio bat sortu zuen Sionen (Suitza) musika klasikoa zuzendariari gustatzen zitzaion moduan sustatzeko. Promozio horren barnean, Polonian eta Suitza frankofonoan musika hezkuntzaren alde egiten da eta ekitaldiak antolatzen dira entzuleak musika klasikoa entzutera ohitu daitezen.
2022-23 denboraldi sinfonikoko azken orduko sarreren salmenta jarri dugu abian.
Azken orduko sarrerak deskontu handia dute, jatorrizko prezioaren % 50 ingurukoa.
Denboraldi sinfonikoan, saio bakoitzeko, gehienez 50 azken orduko sarrera jarriko ditugu salgai. (baldin eta sarrerak eskuragarri badaude)
Sarrerak saio bakoitza hasi baino 24 ordu lehenagotik erosi ahal izango dira.
Azken orduko sarrerak txarteldegian erosi daitezke eta baita online ere, gure webgunean. Aurreko denboraldian ez bezala, oraingo honetan ez da promozio-koderik behar online erosketan deskontua aktibatzeko.
Erosketa-prozesua arintzeko, online erostea eta kreditu/zordunketa txartel bitartez ordaintzea gomendatzen dizuegu.
Miroslaw Hodorek, bigarren biolinen lerroko kideak, erretiroa hartu du 36 urtez BOSen parte izan ondoren.
Zorterik onena opa diogu hasi berri duen etapa honetan, eta bihotz-bihotzez eskertzen diogu zazpi bosturteko pasatxo hauetan egindako lana, izan ere, eskaintzeko zuen onena eman baitigu Orkestra hazten laguntzeko.
Musika paraleloak. Konpositore garaikideen arteko antzekotasun eta desberdintasunak
Irakaslea: Mercedes Albaina.
Zikloaren edukia
Hitzaldi-ziklo honetan aurrez aurre jarriko ditugu bina konpositore garaikidek osaturiko hiru bikote. Garai berekoak izan arren, jatorri desberdinekoak izango dira. Pareko inguruabar historikoak bizi izanagatik ere beren obretan suma daitezkeen desberdintasun estilistikoak nabarmenduko ditugu, baita antzekotasunak ere. Modu horretan Plutarcok bere «Vidas Paralelas» liburuan asmaturiko metodo biografikoaren aztarnak jarraituko ditugu.
Bikote bakoitza garai historiko jakin batekoa da. Horri esker, gainera, aukera izango dugu musika-hizkuntzaren eboluzioari loturiko bilakaera estetikoaren zati bati erreparatzeko, baita musika klasikoak kultura europarra eraikitzerakoan egindako ekarpenari erreparatzeko ere.
Alderatuko ditugun bizitzak eta partiturak honako hauek izango dira: Vivaldi-Bach, Verdi-Wagner eta Debussy-Strauss (Richard). Bikote horietako bakoitzarekin batera, emakumezko batek planteamendu historikoa eta estetikoa borobilduko du. Emakume horiek izango dira, ondoko hurrenkera honetan: Élisabeth Jacquet, Clara Wieck eta Cécile Chaminade.
Egunak, ordutegia, lekua eta prezioa
Oraingo honetan, laster Arte Ederren Museoan egingo diren eraberritze-lanak direla eta, zikloak 3 saio izango ditu.
Egunak: 2022ko urriaren 19an eta 26an; azaroaren 2an. Asteazkenak.
Ordutegia: 19:00etatik 20:15era.
Zikloa nola egin:
1. aukera: Aurrez aurre: Bilboko Arte Ederren Museoko auditoriumean. 2. aukera: Online: astean behin kode bat bidaliko da, saio bakoitzeko bideoak ikusi ahal izateko.
Tarifak
1. aukera.
33 € (BOSeko abonatuak eta Bilboko Arte Ederren Museoaren Lagunak). 40 € (Publiko orokorra). 2. aukera.
28 € (BOSeko abonatuak eta Bilboko Arte Ederren Museoaren Lagunak). 38 € (Publiko orokorra).
Informazio gehiago eta izen-ematea
Aurten, irailaren 26tik aurrera, telefonoz edo emailez. Ordutegia: astelehenetik ostiralera, 10:00etatik 14:00etara.
T. 658 721 059 • musikahazi@bilbaorkestra.eus
Dagoeneko zure abonamendua aukeratu baduzu, laster jasoko duzu etxean, posta bidez, denboraldi honetan aukeratu dituzun kontzertuetara joateko txartela.
Gogoratu “nahierako” abonatua izanez gero, aukeratu dituzun kontzertuen berri eman behar diguzula. Hori egiten ez duzun arte, ezingo dizugu txartela etxera bidali.
Abonatu gabeak
2022-2023 denboraldi sinfonikorako prestatu ditugun abonamendu-mota desberdinak prest dituzu dagoeneko. Zure lehentasunetara hobekien moldatzen dena aukeratzea baino ez duzu. Eta gogoratu BOSen denboraldiko abonamenduarekin, sarrera solteen prezioaren gainean deskontu handia izateaz gain, beste abantaila eta onura batzuk ere lor ditzakezula, hala nola kontzertura joateko eguna aldatzea, sarrera solteak erosteko deskontuak, etab.
BOSek hainbat abonamendu-mota eskaintzen ditu, zure lehentasunetara eta interesetara egokitzeko.
Denboraldi osoko abonamendua (17 kontzertu)
Denboraldi osoko abonamenduak BOSek denboraldian zehar eskainiko dituen hamazazpi kontzertu sinfonikoez gozatzeko aukera eskaintzen du, sarrera solteen prezioaren gaineko deskontu handi batekin.
Gaikako abonamendua. Musika eta kontsolamendua (4 kontzertu)
Programak: 1, 11, 15, 17
Mendeurreneko denboraldiko gure abonamendu tematikoa orkestrako ahotsaren munduari eskainiko diogu.
Hastapeneko abonamendua (6 kontzertu)
Programak: 2, 7, 10, 14, 16, 17
Askotariko sei kontzertu biltzen ditu, berehala gozatzekoak eta musika sinfonikoaren mundurako sarbidea direnak.
Nahierako abonamendua-6 (6 kontzertu)
Abonamendu honek malgutasun handia eskaintzen du, neurrira egindako 6 kontzerturen hautaketa egiteko aukera ematen baitu.
Nahierako abonamendua-9 (9 kontzertu)
Abonamendu honek malgutasun handia eskaintzen du, neurrira egindako 9 kontzerturen hautaketa egiteko aukera ematen baitu. Auditoriumeko edozein eserlekutan erabil daiteke, A+ zonako eserlekuetan izan ezik.
Bilbao Orkestra Sinfonikoak eta Guggenheim Bilbao Museoak ekainaren 18an ospatuko dituzte urteurrenak; horretarako, doako kontzertu paregabe bat eskainiko dute, bi saiotan banatuta, 20:00etan eta 23:00etan.
Lehenengo emanaldia, 20:00etakoa, BOSen abonatuei eta Museoko Lagunei eskainita dago. BOSek 120 sarrera ditu, eta abonatuen artean banatuko ditu prozedura honi jarraiki:
Kontzertura joateko interesa dutenek mezu elektroniko bat bidali beharko dute helbide honetara: bos@bilbaorkestra.eus
Mezuak ostiraletik, ekainaren 3ko 09:00etatik, aurrera bidali beharko dira (ordu hori baino lehen jasotako mezuak ez dira kontuan hartuko).
Mezu horren gaian honako hau adierazi beharko da: Ekainaren 18ko kontzerturako sarrerak.
Eskaera egiten duen pertsona abonatuaren izena, bi abizenak, NANa eta telefono-zenbakia adierazi beharko dira.
Gehienez ere bi sarrera eskatu ahal izango dira. Pertsona batek mezu bat baino gehiago bidaltzen baditu, lehenengo mezua baino ez da kontuan hartuko.
Mezuak iristen diren hurrenkeraren arabera emango dira sarrerak, agortzen diren arte.
Mezu elektroniko baten bidez jakinaraziko da sarrera lortu dela. Sarrerak ere posta elektroniko bidez bidaliko dira.
Kontzertuaren programa
Bilboko Sinfonikoaren mendeurrenarekin bat eginik, Guggenheim Bilbao Museoak 25. urteurrena ospatuko du. Ospatzeko arrazoi bikoitz horrekin, Museoaren Atrioa herritarrei irekitako kontzertu handi baten eszenatokia izango da. Kontzertu horren egitarauaren baitan “Erakusketa baten koadroak” obra izango dugu entzungai, Modest Mussorgskyk bere lagun Viktor Hartmanni omenaldia egiteko erabili zuen obra, hura hil ondoren haren zenbait obrekin antolatutako erakusketa baterako. Pieza horrek koadroz koadro irudikatzen du bisitariaren ibilbidea, deskripzio-estilo sendoarekin. Jatorrian pianorako konposatua, Maurice Ravelek behin betiko koloreztatu zuen musika orkestrazio bikain batekin. Klasiko bikain horrekin batera, historiak —beste lankide batzuekin batera— bidegabeki tratatu duen konpositore baten lana berreskuratuko dugu: Augusta Holmès frantziarrarena, hain zuzen. Publikoak Andromeda poema sinfonikoaz gozatzeko aukera izango du, lengoaia trinko eta boteretsua duena. Arteen arteko laguntasuna eta dialogoa goraipatzeko aukera ederra izango da.
Eguna eta ordua: Ekainaren 18an, 20:00etan. Tokia: Museoko Atrioa Sarrerak: doan Babeslea:
