Kit Armstrong

Pianoa

The New York Times egunkariak «heldutasun musikala eta gazteen ausardia interpretazio paregabe batean» uztartzen dituen «piano-jotzaile bikain» moduan deskribatu zuen. Ildo horretan, Kit Armstrong munduko orkestra onenek gonbidatzen dute bakarlari gisa, eta, aldi berean, ibilbide bizia du errezitaldietako jotzaile eta konpositore gisa. 1992an jaio zen Los Angelesen, «Armstrong harridura sortzen duen piano-jotzailea da, eta musikari miragarritzat, ez besterik, deskriba daiteke» (Süddeutsche Zeitung). Areto ospetsuenetan aritu ohi da, hala nola Vienako Musikverein, Amsterdamgo Concertgebouw, Berlingo Philharmonie, Hanburgoko Elbphilharmonie, Tokioko NHK Hall, Bruselako Arte Ederren Jauregian eta abarretan.

Christian Thielemann, Herbert Blomstedt, Riccardo Chailly, Kent Nagano, Manfred Honeck, Esa-Pekka Salonen, Mario Venzago, Robin Ticciati eta beste hainbat zuzendarirekin kolaboratzen du aldiro. Wiener Philharmoniker, Dresden Staatskapelle, Bayerische Rundfunk Sinfonieorchester, Gewandhaus Orchestra, NHK Symphony Orchestra, Academy of St. Martin in the Fields eta beste orkestra batzuekin batera jo du. 2018an, Mecklenburg-Vorpommern jaialdiko artista egoiliarra izan zen, baita Musikkollegium Winterthur jaialdikoa ere.

Azken denboraldietan, Berlingo DSO Deutsches Symphonieorchester, NDR Elbphilharmonie Orchestra, Baltimore Symphony edo Tokioko Metropolitan Symphony orkestrekin egin du debuta. Bestalde, bira bat egin du Europan Swedish Chamber Orchestraren eta Berlingo Akademie für Alte Musik orkestraren eskutik; lankidetza estu eta etengabea dauka azkenarekin. Parisko Théâtre des Champs-Elysées, Municheko Prinzregentheater, Ruhr-eko Klavierfestival jaialdian, Luxenburgoko Philharmonie eta Koloniako Philharmonie festibaletan jo du berriki.

Ganbera-musikaren zale amorratua izanik, Kit Armstrongek aliantza artistiko estuak garatu ditu beste instrumentista eta abeslari batzuekin. Renaud Capuçonekin, Mozarten biolin eta pianorako sonaten integrala aurkeztu du Salzburgoko Mozartwoche-n eta Berlingo Boulez Saal-ean. Christiane Karg, Julian Prégardien eta beste batzuekin batera, Lied errepertorioa jo du. Organoa jotzen ere (horixe da bere pasio handienetako bat) entzun dugu Berlingo eta Koloniako Philharmonien. Peters argitaletxeak 2006tik argitaratzen ditu Armstrongen lanak; Leipzigeko Gewandhaus eta Musikkollegium Winterthur erakundeek ere, besteak beste, lanak komisionatu dizkiote.

Grabazioetan, bakarkako lanak ditu: «Liszt: Symphonic Scenes» izeneko albuma eta «Bach, Ligeti eta Armstrong» konpositoreen musikari eskainitako albuma, bi-biak Sony Classic etxerekin ekoitzitakoak. 2017an DVD bat grabatu zuen Amsterdamgo Concertgebouwn (Unitel), «Kit Armstrongek Bachen eta aurrekoen Goldberg bariazioak jotzen» izenekoa, eta Bachen obra ospetsuaren erreferentziazko grabazio bihurtu zen (BBC Music Magazine-ren arabera).

Kit Armstrongek Los Angeleseko Curtis Institute of Music eta Londresko Royal Academy of Music erakundeetan ikasi zuen. 7 urterekin,

konposizioa ikasten hasi zen Chapman Universityn eta Fisika California State Universityn; handik gutxira, Kimika eta Matematika ere ikasi zituen Pennsylvaniako Unibertsitatean, bai eta Matematika ere Londresko Imperial Collegen. Matematika hutseko masterra egin zuen Parisko Unibertsitatean. 2005az geroztik Armstrongen irakasle eta aholkulari gisa jardun duen Alfred Brendelek honela deskribatu du: «piano-literatura handia ulertzen duen piano-jotzailea da, freskotasuna eta sotiltasuna, emozioa eta adimena uztarturik». Haien arteko harremana Mark Kidelek zuzendutako «Set the Piano Stool on Fire» filmean agertu zen.